28. 5. 2018: На Днї приятельства добросусїдьства підписали протоколы
Председове Кошіцького і Пряшівского самосправного краю Растіслав Тырнка і Мілан Маєрьскый підписали 26. юна 2018 з представителями Закарпатьской области Україны выконавчі протоколы ку меморандуму о сполупраці на слїдуючій рік.
Протоколы были підписаны на гранічнім переході Вышнє Німецьке в рамках традічного Дня приятельства і добросусідьства, котрый є повязаный із културным проґрамом. Інформовала о тім словацька публічна пресова аґентура TASR.
Выконавчій протокол обсягує актівности в областях реґіоналного розвитку, освіты, културы, турістічного руху, помочі і розвитку співпраці на уровни містной самосправы, як і соціалных служеб ці жывотного оточіня.
Як повів про аґентуру Растіслав Тырнка, председа Кочыцького самосправного краю, од підписаня Рамкового договору і Закарпатьсков областнов державнов адміністраціёв перешло вже десять років, і за тот час зреалізовало ся дакілько проєктів. В тых актіностях буде продовжовати ся, жебы укріпити прязны приятельскы односины. За Україну документы підписали представителї Закарпатьской областной державной адміністрації Ґеннадій Москаль і Осиф Боркот. Ку підписованю протокілів придали ся і села з обидвох боків граніцї За Кошыцькый самосправный край село Тібава з партнерьскым селом Бобовище, Остров і Кібляры, Оріхова і Оріховцї і село Руська зо селом Паладь-Комарівцї. За Пряшівскый самосправный край підписали протоколы Біловежа із партнером Верьхнїй Копорець, Куримка і Іванівцї, Камюнка і Руськы Комарівці, Гажлин і Чинадієво.
Меморандум, ку котрому підписали ся вже 10-ты выконавчі протоколы, быв підписаный в окторбрі 2006-го року. Меджі планованы актівности в будучности належыть сполупраца коло реалізації і пропаґації біціґлёвых корідорів, но і черяня інформацій і скушеностей при сохранїню културной дїдовизны. Приготовлюють ся і освітнї проґрамы про робітників соціалных заряджінь, жебы злїпшыти їх службы.
На Днїприятельства і добросусїдьства ани тот рік не хыбовав културный проґрам. Зо Словакії выступали фолклорны колектівы Земплін із Михаловець і Барвінок з Камюнкы.
П. М.
